Bemvindu ba Sua Exélensia Ministru Negosiu Estrageiru Japaun Sr. Taro Kono ne’ebé vizita mai Timor-Leste.
Apresia no louva tebes relasaun
diplomasia polítika mutual entre Japaun ho Timor-Leste ne’ebé hahú iha 2002
to’o agora. Ami rekoñese katak iha apoiu oin-oin ne’ebé gradualmente mai husi
Governu Japaun ba ami nia Governu iha tinan 16 nia laran no apoiu hirak ne’e
sei kontinua iha futuru liu husi Agensia Dezenvolvimentu sira.
Maski nune’e,
ami haree iha lidun balu Inan feto sira hafalun ho fuan fitár ne’ebé
uluk sofre husi aktu militár Japaun iha tempu segundu Guera Mundial (1942-45)
dadaun ne’e sei kontinua halerik ho sira nia sentimentu no kous mesak todan
pasadu iha nia moris durante tinan naruk nia laran. Kuaze situasaun ne’ebé
hanesan mos parte família sira hasoru iha sira nia hela fatin.
Tuir Asosiasaun HAK nia dadus
deskobrementu feto nain 20 ne’ebé mak konsege ho aten brani haktuir sai sira nia istória nakukun ba hahalok imoral
no brutalismu husi tropas Japonéz, iha
segundu Guerra Mundial (1942-45 no vítima sira agora iha kondisaun miseravel husi aspeitu fíziku no sikólozia tanba hetan sofrementu oi-oin ne’ebé extrimamente nakonu ho depresaun estraordináriu nia laran.
Tan ne’e ami fó hanoin ba Sr. Taro
Kono atu lori lia tatoli ne’e ba Sua Exélensia Primeiru Ministru Sr.
Sinzho Abe atu prudentimente ho fuan boot hodi labele ignora vítima ho família
sira ne’ebé infrentra situasaun kruél
Ami mós husu atu hametin liu tan
relasaun polítika diplomasia rai rua ne’ebé mak metin maibé LABELE ABANDONA vítima Jugun Ianfu iha
tempu segundu guerra mundial ne’eb’e la’os de’it Timór maibé mós iha fatin
seluk, mak hanesan KOREA DO SOUL, THAILANDIA, FILIPINA, MALAYSIA, INDONEZIA no JAPAUN rasik ne’ebé agora dadaun
ne’e hela iha situasaun miseravel nia laran.
“Ignora no abandona ezizensia Lia
Loos no Justisa ba vítima Jugun Ianfu nu’udar aktu krime grave no violasaun Direitus Umanus foun iha tempu agora”.
Dili,12 Outubru 2018