DILI, (TATOLI) – Ativista
direitu ema-nian atuál Diretór Fundasaun Direitu Ema-nian no Justisa (Yayasan
HAK), Manuel Monteiro, sujere ba lider istóriku sira atu husik hela lisaun
di’ak ba jerasaun foun sira atu banati tuir.
“Sira tenke husik hela buat ne’ebé di’ak
mai ita. Agora ita hatutan oinsá enkuantu sira rasik rai hela polítika ódiu no
vingansa ba malu. Ne’e sei buras no sei aat liu-tan iha jerasaun foun sira nia
moris”, Monteiro ba Tatoli iha nia kna’ar fatin Faról, tersa ne’e relasiona ho
laiha estabilidade polítika entre lider istóriku sira.
Tuir nia se lider istóriku sira husik hela
lisaun di’ak ba jerasaun foun maka entre sira ne’e rasik la presiza iha
intermediáriu, maibé sira rasik maka tenke iha fuan boot atu buka malu hodi
hakotu situasaun inserteja polítika ne’ebé maka iha.
“Bainhira ida ne’e maka sira hakotu ona,
maka husik hela lisaun di’ak mai ita atu kontinua sira nia rotan ukun ninian ba
ukun ida ne’ebé maka demokrátiku, ukun ida ne’ebé maka respeitu lei, ukun ida
ne’ebé maka tane aas valór umanidade no valór solidariedade ba malu”, Manuel
haklaken.
Nia haktuir inserteja polítika ne’e mosu,
tanba orgaun soberania sira la haree didi’ak artigu 69 Konstituisaun Repúblika
(prinsípiu separasaun poder).
Nia dehan bele iha separasaun poder maibé
iha interdependénsia ba malu, tanba ne’e, kuandu deskorda buat balun ne’ebé
liga ba asuntu nasionál, ne’e la signifika katak sira atu hamosu impase
polítika, maibé fó atensaun ba malu hodi kuida asuntu nasionál.
“Atu rezolve kestaun ida ne’e, orgaun
soberania sira maka tenke halo komunikasaun polítika di’ak ba malu hodi hatán
de’it ba interese povu nian. Labele hamosu polítika ódiu no vingansa iha orgaun
Estadu sira. Polítika ódiu vingansa ne’e sei rezulta povu sai vítima”, tenik.
“Ba ami, fukun boot ne’e maka kandidatu
membru Governu na’in sia (ida rejigna-án ona) ne’ebé maka seidauk simu tomada
pose. Tanba ne’e, husu ba nai ulun sira atu deskuti diskute didi’ak, nune’e
solusiona lalais”, Manuel salienta.
Jornalista: Xisto Freitas
Editora: Rita Almeida