Sosiedade Sivíl sira hanesan, Asia
Justice and Right (AJAR), no Asosiasaun HAK, kestiona servisu Ministériu
Públiku (MP), nian ne’ebé to’o agora la halo notifikasaun ka akuzasaun hasoru
autoridade Rejiaun Administrativa Espesial Oecusse (RAEOA), maske Câmara de
Contas deklara ona katak, autoridade RAEOA halo infrasaun finanseira hodi
halakon osan Estadu nian.
Sosiedade sivíl mos husu ba Ministériu
Públiku (MP) atu halo esplikasaun ba públiku kona ba tanba saida mak la halo
akuzasaun ba Autoridade Rejiaun Administrativa Espesial Oe-cusse Ambeno
(RAEOA), ne’ebé akuzadu iha infrasaun finanseira.
“Ha’u hanoin iha razaun, ita nia jutisa,
liu-liu iha Ministériu Públiku ne’e mós dala barak povu kbi’it la’ek
ne’ebé senti diskriminadu iha ninia prosesu, iha situasaun agora hanesan ne’e,
ema iha dezeju bo’ot ba tribunal sira atu bele fó justisa ba sira, maibé dala
barak prosesu ne’e ema senti hanesan la’o diskriminativu oituan,
politizadu oituan. Tanba ida ne’e ha’u hanoin buat ida ne’e iha razaun”,
dehan Jose ba Jornalista GMN iha Universidade da Paz Usindo Díli, Kuarta
(20/02/2019).
José Luis Oliveira haktuir, presiza
tebes Ministériu Públiku atu foti medidas, atu hametin nafatin kredibilidade,
konfiansa povu nian ba situasaun ida ne’e.
Tuir José Luis Oliveira, deputadu sira
lamenta, tanba kazu ne’e bo’ot, no kleur ona, entaun povu mós lamenta no
senti katak, tribunal ne’e la funsiona ho di’ak atu fó justisa.
“Tuir prinsípiu, ema tenki hetan prosesu
ne’e hanesan katak, ida ne’ebé mak la’o uluk bazea ba lei ka lae. Mai
ha’u situasaun ida ne’e presiza tebes, atu parte Ministériu Públiku halo
komunikasaun ba públiku, prosese ne’e la’o to’o ne’ebé? la’os ko’alia kona ba
substansia husi kazu ne’e, maibé esplika para ema bele hatene
prosesu ne’e la’o oinsa, no sira hetan difikuldade saida? Agora dadaun ita bele
dehan katak, husi perspetiva direitu humanu, direitu povu nian atu hatene
lolos informasaun, ne’e violadu hela husi tribunal, tanba la halo
esplikasaun”, relata Luis Oliveira.
Entretantu, Diretór Asosiasaun Hak mós
esklarese, Estadu Timor-Leste ne’e, Estadu direitu katak, Estadu funsiona tuir
lei ba se de’it, ne’ebé mak hatene aktu violasaun ruma kontra lei, tenki hato’o
keixa, no ba kazu dadauk CNRT sira levanta katak, Ministériu Públiku la
halo akuzasaun ba aktu sira ne’ebé mak iha indikasaun korupasaun, entaun la
sala hanesan sidadaun organizasaun ida, no instiuisaun ruma bele
partisipa keixa ba iha tribunal, hodi prosesa kazu ne’e, atu
nune’e ema hotu hatene’e katak, aktu ne’e viola duni lei.
“Ita hotu la tolera hahalok sira
ne’ebé mak kontra lei, tanba prinsípiu Estadu, de direitu, nune’e mós kazu sira
ne’ebé akontese iha tempu pasadu, no ita hotu iha lei nia okos hanesan, la fó
biban ba se de’it atu komete sala, liu-liu ba sira ne’ebé komete krime korupasaun
ne’e inimigu povu ninian”, katak Manuel.oly
Fontes : GMN-TV (Media Online-
21/02/2019